Praza das letras

Transcorreu un ano desde a marea negra. Otero, conselleiro do goberno autonómico, presenta aos medios de comunicación unha campaña propagandística que anuncia a limpeza total das praias e a recuperación do sector pesqueiro. A campaña é, en realidade, un exercicio de manipulación informativa no que interveñen políticos e xornalistas. Con Otero, coñecemos o resto dos personaxes desta historia: unha ambiciosa presentadora de televisión, un pescador en paro, un mariñeiro que fixo negocio da desfeita ecolóxica, un redactor desencantado e un activista a favor do voluntariado.

A conta atrás é unha viaxe no tempo. Arrinca un ano logo dunha marea negra e vai repasando en sentido inverso, indo cara atrás, a historia do desastre ata chegar a como era a vida dos protagonistas antes do naufraxio... Unha viaxe que afonda nos porqués das cousas.

Unha novela gráfica para adultos, inspirada no desastre ecolóxico que máis ríos de tinta fixo correr nos últimos anos. Vén apadriñada co prólogo do escritor Manuel Rivas e inclúe unha entrevista ao guionista e ao ilustrador realizada por Álvaro Pons, crítico especializado en cómic.

[fonte: presentación editorial]