Praza das letras

Vinte relatos nos que Dieste trata con modernidade a presenza do sobrenatural no mundo popular. Rafael Dieste (Rianxo, 1899 - Santiago de Compostela, 1981) publicou Dos arquivos do trasno no ano 1926. Desde aquela data, o libro non cesou de medrar na consideración dos lectores e da crítica. Con el a arte do conto acada modernidade para amosar as pegadas do imaxinario galego cunha brillantez inusitada. "O conto é o remuíño que fan arredor dunha lámpada moitas bolboretas, todas mergulladas na mesma luz". Esta é unha das sentenzas que no limiar do libro dá Dieste sobre a súa forma de entender o relato. E presenta a continuación contos breves, intensos, de linguaxe estilizada, nos que o sobrenatural e o misterioso se introducen na realidade. Un mundo narrativo no que o inexplicábel e o extraordinario se mestura de xeito indisolúbel co popular e co cotián. Un anticipo do realismo máxico situado nas vilas mariñeiras de Galicia.