Praza das letras

Historia estremecedora e impactante dunha muller marcada polo seu pasado, pola súa memoria imborrábel como supervivente do Holocausto. Non sabe o seu verdadeiro nome, o día ou o país no que naceu. A súa única certeza é: "No seu camiño cara á morte, a miña nai lanzoume á vida”. Frases curtas e tan contundentes dan conta do seu drama e das dúbidas que a acompañan de por vida sobre os sufrimentos da súa familia. A portada contén un troquelado con forma de estrela de seis puntas, símbolo xudeu que os prisioneiros dos guetos e dos campos de concentración levaban prendido na roupa. As ilustracións, de estilo hiperrealista, xogan co pasado e co presente. Innocenti emprega unha paleta de grises para as imaxes evocadoras e reserva a cor para escenas simbólicas. Un canto de vida e esperanza.