Praza das letras

Inserido na colección para nenos de 0 a 3 anos, O Parrulo, Este é o medo pretende ser unha ferramenta máis, a disposición dos pais, os seus principais educadores, e dos mestres, os grandes formadores, para a diversión e a aprendizaxe do neno nos primeiros anos da súa vida, por outra banda, os máis importantes para a adquisición de coñecementos. Editado con cores vistosas e letras manuscritas, comprensíbeis para os rapaces desas idades, os textos e os debuxos de Oli e Pepe Carreiro fan pensar e reflexionar aos máis pequenos sobre algo tan intanxíbel e tan humano como é o medo. Os cativos séntense identificados coa historia, que comparten cun neno e cunha nena, os protagonistas reais da narración.