Edicións Embora
Nacida coa vocación de editorial de estudos ferroláns, durante a súa primeira etapa centrouse nos libros sobre a historia, costumes e tradicións da cidade. Co paso dos anos, Embora derivou cara á creación literaria e, na actualidade, conta con coleccións de narrativa, poesía e teatro en lingua galega. Ademais, a editorial mantén a temática ferrolá na colección Biblioteca de Ferrolterra; fai edición de facsímiles na colección Faber Lucis; e, por último, dá saída a traballos de tipo social, memorialístico e histórico baixo a etiqueta de Fuco Buxán.