Antón Riveiro Coello
1964, Xinzo da Limia
Narrador
Antón Riveiro Coello cursou estudos de Dereito na Universidade de Santiago e actualmente traballa na administración autonómica. É un dos narradores máis premiados dos xurdidos na literatura galega durante a pasada década.
Ademais dun gran número de relatos en libros colectivos e revistas literarias ten publicadas as novelas Valquiria (1993, premio Camilo José Cela), A historia de Chicho Antela (1997), A quinta de Saler (1999), coa que foi finalista do premio Torrente Ballester, así como as recompilacións de relatos Parque Central(1996) e Airadas de palabras (1998), onde se recollen os contos que lle foron premiados nos certames Manuel Murguía e Modesto R. Figueiredo entre os anos 1991 e 1997.
Con Animalia (2000) obtivo o premio Café Dublín correspondente a 1999. As rulas de Bakunin recibiu o premio García Barros en 2000, ano no que tamén logrou o Álvaro Cunqueiro de Narrativa con Homónima.
En 2007 publica A voz do lago, novela coa que se interna na creación literaria para os lectores máis novos, e Os ollos de K.