Praza das letras

A Lonxa é unha asociación sen fins de lucro que persegue o fomento da literatura en calquera das súas expresións. Ao longo dos seus oito anos de idade, a asociación veu desenvolvendo as súas actividades iniciais e engadindo outras novas até se converter no axente indispensábel de promoción da lectura na zona de Moaña.

As tertulias literarias comezaron xa en 1999 e, desde os inicios, manteñen o mesmo modelo: cada mes e medio organízase un encontro co autor do libro elixido, coa particularidade de que é este mesmo creador convidado quen recomenda o título seguinte. Co tempo, ás tertulias de literatura para adultos sumáronse as de literatura infantil e xuvenil, que seguen o mesmo mecanismo. Desde que existe a Lonxa Literaria, medio cento de creadores e creadoras da nosa literatura visitaron Moaña.

Para implicar o maior número de persoas e atender todas as idades, os encontros da Lonxa teñen carácter itinerante: cada un ten lugar nunha localización diferente da anterior, sempre dentro do municipio de Moaña. Ademais das tertulias, a asociación desenvolve de forma estábel as seguintes actividades: “A hora do conto”, sesión mensual de contacontos para os cativos en dous centros de ensino do concello; “O conto viaxeiro”, conto que elaboran todos os colexios a partir da primeira páxina escrita por un escritor de literatura infantil e xuvenil; o certame de microrrelatos anual; e mais o recital anual de poesía. Alén diso, a Lonxa organiza tamén actividades puntuais como obradoiros de escrita, presentación de libros, homenaxes ou actos relacionados co Día das Letras.