Praza das letras

Logo do recoñecemento que supuxo a concesión do Pedrón de Honra á súa traxectoria ou de que esta mesmo obra fose escollida como mellor ensaio do ano pola Asociación de Escritores, o profesor Justo Beramendi recibe agora o Premio de Ensaio do Estado polo volume De provincia a nación. Historia do galeguismo político, editado por Xerais en 2007.

De provincia a nación. Historia do galeguismo político é unha investigación sistemática da natureza e evolución dos movementos sociopolíticos de reivindicación de Galicia como suxeito político de seu dende as súas primeiras manifestacións individuais no século XVIII até a actualidade. O tratamento do provincialismo, do rexurdimento e do rexionalismo do século XIX, e máis aínda do nacionalismo galego do século XX, faise cunha profundidade sen precedentes. Para a análise acaída das diferentes dimensións –a ideolóxica, a social, a organizativa, a electoral– e das súas interrelacións, o autor incorpora conceptos e modelos analíticos propios que implican unha notable innovación metodolóxica no eido do estudo do nacionalismo.

Justo G. Beramendi (Madrid 1941) é catedrático de Historia Contemporánea da USC, da que foi vicerreitor, cofundador do Museo do Pobo Galego e actual presidente da súa Xunta Reitora. Participou na creación das revistas Negaciones, A Trabe de Ouro e Tempos Novos. Especializado na historia das ideoloxías e dos nacionalismos, publicou entre outros libros e artigos de investigación, Vicente Risco no nacionalismo galego (1981), Galicia e a historiografía (1993), Manuel Murguía (1998), Alfredo Brañas no rexionalismo galego (1998), O nacionalismo galego (1995), xunto con X. M. Núñez Seixas ou A Autonomía de Galicia (2005). É tamén ou coautor da edición crítica das obras de Losada Diéguez, Ramón Villar Ponte, Peña Novo, Castelao e Risco.

O premio que agora recibe está dotado con 20.000 euros e concédeselle á mellor obra de ensaio publicada en 2007 en español ou nalgunha das outras linguas cooficiais do Estado. O xurado estivo presidido por Rogelio Branco e integrado por José María Pozuelo, Paula Izquierdo e os gañadores das dúas últimas edicións, os filósofos Celia Amorós e José María González.

O Premio de Literatura do Estado foi entregado xa na modalidades de Poesía, outorgado ao poeta catalán Joan Margarit polo seu poemario Casa de Misericòrdia e na de Narrativa, que recaeu no escritor valenciano Juan José Millás pola súa novela O Mundo.