A AS-PG “boa e xenerosa”
Premio AELG á AS-PGA AELG recoñece o labor deste movemento de renovación pedagóxica, con trinta anos de traballo na formación docente ou nos estudos sociais.
A Asociación de Escritores en Lingua Galega (AELG) recoñece o labor deste movemento de renovación pedagóxica, con trinta anos de traballo na formación docente ou nos estudos sociais.
A homenaxe alcanza os cinco anos de vida co tributo que se lle renderá á Asociación Socio-Pedagóxica Galega (AS-PG) pola traxectoria dun movemento de renovación pedagóxica pioneiro que fai os trinta anos de actividade.
No ano 2004 a AELG iniciou a homenaxe “Os bos e xenerosos”, un acto de recoñecemento da figura dun escritor/a ou colectivo que contribuíse a unha maior difusión pública da cultura galega.
Desde daquela recibiron a homenaxe Avelino Pousa Antelo (2004), o Museo do Pobo Galego (2005), a Asociación Cultural e Pedagóxica Ponte… nas ondas! (2006) e o Laboratorio de Formas de Galicia, singularizado na persoa de Isaac Díaz Pardo (2007).
Desta vez o recoñecemento vai para a Asociación Socio-Pedagóxica Galega pola traxectoria dun movemento de renovación pedagóxica pioneiro, integrado hoxe por máis de mil asociados/as e con trinta anos de actividade ininterrompida: formación docente, publicación de materiais didácticos, promoción de espectáculos audiovisuais, elaboración de estudos sociais ou implicación decisiva no proceso de normalización lingüística.
A vinculación da AS-PG co discurso literario de noso foi sempre significativa e así algunhas das súas propostas metodolóxicas tomaron como punto de partida obras e trataron de relacionar a ficción co seu contexto social e histórico.
A data da homenaxe será o sábado 12 de abril, a partir das 11,45 da mañá, no auditorio do Centro Galego de Arte Contemporánea de Santiago de Compostela e o programa comezará cunha actuación musical a cargo do dúo de corda “Noite na auga”.
Seguirá a lectura da acta de concesión do Premio, realizada por Mercedes Queixas Zas, e a laudatio que pronunciará Francisco Rodríguez. Intervirá a seguir Cesáreo Sánchez Iglesias, presidente da AELG, coa entrega dunha placa conmemorativa ao colectivo homenaxeado, e pechará a resposta á laudatio o presidente da AS-PG, Xoán Costa Casas. Ás 14,30 está previsto un xantar no restaurante do Hotel Porta do Camiño.