Praza das letras

Con motivo da presenza de Galicia como país convidado na Feira Internacional do Libro que terá lugar na Habana do 13 ao 24 de febreiro, a CRTVG sorteará entre os participantes unha viaxe para dúas persoas á feira cubana, xunto coa delegación galega.

Coa intención de que o pobo galego e o pobo cubano retomen o contacto epistolar que houbo tradicionalmente entre ambas as dúas beiras, a CRTVG proponlles aos galegos que lles escriban "unhas letras" aos cubanos, nos días previos á Feira do Libro da Habana. As mensaxes deben ser breves, de non máis de 160 caracteres, estar escritas en galego e ter vontade literaria. Os participantes poden deixar os seus microrrelatos na web do concurso.

O prazo para participar comeza hoxe e estenderase ata o día previo ao comezo da Feira, isto é, ata as 24:00 horas do 12 de febreiro. Todas as mensaxes recollidas ata ese momento participarán no sorteo dunha viaxe para dúas persoas a Cuba co gallo da Feira Internacional do Libro da Habana e, unha vez comezada a Feira do Libro da Habana, serán entregadas aos seus destinatarios, o pobo cubano, a través dunha pantalla situada no pavillón de Galicia. Ao tempo, os visitantes que se acheguen á zona de Galicia no recinto feiral, poderá ir deixando alí mesmo as súas letras para o pobo galego, que estarán accesíbeis na páxina web da CRTVG.