Tamén está previsto a asistencia ao Saló do Cómic de Barcelona, o principal evento específico en banda deseñada na Península Ibérica. Desta maneira consolídase a asistencia de Galiza, que xa estivo presente cun stand oficial de seu na edición deste ano.
A promoción internacional tamén inclúe a partipación en feiras internacionais do mundo editorial, como son as feiras do libro de Boloña e de Frankfurt, a máis importante do mundo. A banda deseñada galega tamén terá un espazo de promoción no marco da Feira do Libro da Habana, da que Galiza será país convidado no ano 2008. Na capital cubana, instalarase unha exposición que recollerá a creación da banda deseñada galega na última década e asistirán autores e deseñadores.
Estratexia coordinada con todo o sector
Desde o primeiro semestre do 2006, a Dirección Xeral de Creación e Difusión Cultural creou un grupo de traballo sobre banda deseñada no que están integrados o Consello da Cultura Galega, a Asociación Galega de Profesionais da Ilustración (AGPI), a asociación Polaquia, a asociación BD Banda, as Xornadas de Banda Deseñada de Ourense e o Festival Viñetas desde o Atlántico.
O obxectivo é consolidar as bases que precisa a creatividade que están a amosar os autores galegos. O resultado é que, por primeira vez, a banda deseñada galega conta cun completo programa de apoio. Xunto á promoción internacional estáse a traballar na adquisición e difusión de obras, exposicións e actividades formativas en centros escolares, bibliotecas e librarías.