Praza das letras

O ciclo de conferencias que complementa a exposición 'A palabra e os días. Homenaxe a Xosé María Álvarez Blázquez', que se pode visitar até o 25 de maio na Casa Galega da Cultura de Vigo (Praza da Princesa, 2) remata hoxe coa intervención da arqueóloga Pilar Barciela. A súa conferencia versará sobre outra das moitas facetas que abrangueu a actividade cultural do tudense, que durante anos desempeñou o cargo de Comisario de Escavacións Arqueolóxicas da cidade olívica.

Froito das numerosas escavacións que Álvarez Blázquez realizou son moitas das pezas que hoxe se exhiben no Museo Quiñones de León ou Museo de Castrelos, cuxa sección de historia chegou a dirixir el mesmo. Barciela afondará nestes e noutros asuntos a partir das 20 horas.