Praza das letras

Víctor Fernández Freixanes, escritor e director editorial de Galaxia, será o responsábel de rememorar a crucial contribución que Xosé María Álvarez Blázquez fixo ás nosas letras desde o terreo da edición. Fundador das editoriais Monterrey e Castrelos e promotor, nesta última, das exitosas coleccións populares O Moucho e Pombal, o tudense non só realizou un impecábel labor de produción, senón que implantou formas pioneiras de distribución que levaron a literatura galega a uns niveis de espallamento nunca antes coñecidos.

A conferencia forma parte do ciclo que complementa a exposición 'A palabra e os días. Homenaxe a Xosé María Álvarez Blázquez', que se pode visitar desde o 21 de abril até o 25 de maio na Casa Galega da Cultura de Vigo (Praza da Princesa, 2). O 20 de maio, Pilar Barciela falará das achegas do homenaxeado ao campo da arqueoloxía, na que será a conferencia de clausura do ciclo.