A través da creación dun día específico que sirva para amosarlle a importancia da poesía á opinión pública, esta organización quere impulsar accións para soster este xénero literario. Entre elas, pode mencionarse a valoración do esforzo realizado por todos aqueles pequenos editores que intentan entrar no mercado e fomentar o coñecemento e a lectura da poesía; o impulso dunha volta á oralidade e ao espectáculo en vivo a través dos recitais ou o intento de restablecer o diálogo da poesía coas demais artes (danza, teatro, música, pintura...) e temas de actualidade (a cultura da paz, da non violencia, da tolerancia...). Outro dos obxectivos marcados pola UNESCO neste senso é a mellora da imaxe da poesía nos medios de comunicación social, para que deixe de considerarse o arte poético como trasnoitado e se recoñeza a súa relevancia como unha arte que permite á sociedade no seu conxunto recuperar e afirmar a súa identidade.
A Dirección Xeral de Creación e Difusión Cultural volverá a conmemorar esta data, en 2008, coa organización de recitais, lecturas colectivas, actos de poesía na rúa, encontros de poetas, mesas redondas...